Iyo katangah urang banyak
Matonyo indak dimainkan
Sanyumnyo indak kanampakan
Lah taraso dek nan banyak
Si Gaek si Angek Garang
Kan tagak pulo inyo mamaso
Mamaso Tuanku Koto Tuo
Kan manyarahkan dang anaknyo
Iko taraso dalam hati
Iyo kapado Mayang Taurai
Tapi apo kan disabuik
Indak kan ado itu garan
Iyo urang nan barani
Malawan si Angek Garang
Kurenah samo jo namonyo
Namo paragiah urang banyak
Dek urang lamo tatakua
Bakato sanan Tuanku Sati
Bapak dek Puti Pinang Masak
Mano Tuanku anak ambo
Tapikia di ambo sabantako
Kok nan banyak lai satuju
Dek neneknyo itu garan
Banamo Puti Pamato Intan
Andeh ambo baitu pulo
Banamo Puti Reno Intan
Inyo itu kito bari namo
Iyolah Sutan Majo Intan
Bakato rajo maso itu
Dek sayang alun abih juo
Iyo ka puti Pamato Intan
"Kok baitu kan baiaknyo
Namo di agiah dek Datuaknyo
Dek ambo manuruik sajo
68
