IV PUTI MAYANG TAURAI.
Alun lai sampai tujuah hari
Sasudah alek turun mandi
Alah disuruali tu mah garan
Iyolah urang tuo-tuo
Dek Rajo Tuanku Mangkuto Ameh
Kanagari Koto Tuo
Ka Ustano Tuanku Sati
Iyolah pai manalangkai
Mamintak Puti Mayang Taurai
Tantang Puti Mayang Taurai
Alah taraso tu mah garan
Bahaso urang tu kan datang
Bakato inyo ka andehnyo
Ampunlal ambo andeh kanduang
Kok datang urang maminang
Dari nagari Koto Lamo
Usah pinangnyo ditarimo
Ambo lah tau bana
Baapo jalieknyo rajo nantun
Iyolah Rajo Angek garang
Namonyo sajo lah baitu
Tasuo dalam kurenahnyo.
Ambo mandanga kaba jaleh
Dari kak Sutan Maulano
Sangkek inyo singgah siko
Sabalun pai ka Koto Anau
Bahaso matinyo kak Tuo ambo
Kak Tuo Puti Pinang Masak
Dibunuah Rajo Angek Garang
Takuik bana ambo kironyo
Ka samo iduik jo urang tu
Malieknyo sajo ambo sagan
76
