Halaman:Rangkiang Luluih.pdf/87

Kito ko urang basabalahan
Kok indak urusan minantu ambo
Kitokan basuo-suo juo"
"Kok baitu kan eloknyo
Kami iyo manarimo suko
Urang lapa diagiah nasi
Urang auih disuruah minum
Daulu andeh bajalan
Kami turukkan dari balakang"
Lah sudah minum jo makan
Siriah alah dikapuo pulo
Alah barangkek urang pulang
Lah tingga Tuanku nan Sakti
Basamo Puti Pamato Intan
Tunduak tangadah kaduonyo
Ndak tantu apo kan disabuik
Alah sabanta antaronyo
Bakato Rajo Tuanku Sakti
"Mano diak kanduang Pamato Intan
Pado pikiran hati ambo
Elok si Mayang kito suruah
Kito suruah lari jauah-jauah
Kanagari Talang Babungo
Di sinan ado adiak ambo
Manjadi pangulu nagari tu
Inyo kawin jo urang sinan
Bia inyo dianta bisuak
Iyo dek urang pandeka rajo"
"Jikok baitu kan eloknyo
Sanang lah pulo hati ambo
Ambo kan lai tau juo
Pado adiak Sutan Lembang alam
Pado pikiran hati denai