Indak nan sanang di usatano
Ado nan lari jauah-jauah
Ado nan lumpuah pulang ka andehnyo
Nan mati lah banyak pulo
Inyo balanteh angan bana
Pado padusi-padusi tu
Talabiah pulo itu garan
Hanyo nan tuo anak rajo
Sarato kakak kanduang kau
Nan lain anak pangulu
Atau mali urang rancak sajo
Bakameh malah Upiak beko
Ditolong andeh kanduang Upiak
Bawolah pakaian Upiak
Tapi usah kasadonyo
Baitu pulo barang Upiak
Iyo nan dari ameh perak
Pagi buto Upiak barangkek
Dianta pandeka rajo
Bawolah kudo sambarani
Tapi lakeh suruah pulang
Usah payah ayah baeko
Kok nak pai kamano-mano
Kudo kito saikua sajo
Elok-elok nak Upiak marantau
Pandai-pandai mambawokan diri
Kok puti bana di nagari
Di rantau iyo dagang juo
Di nagari urang itu isuak
Upiak kan iduik samo gadang
Jo urang kampuang urang dusun
Mandi kan samo satapian
Samo ka ilia jo kamudiak
87
