Bagarak inyo nak manolong
Dalam sakajap itu juo
Bak alang manyemba anak ayam
Mayang Taurai nan kanai semba
Dipangku dibawo turun
Dilarikan kaateh kudo
Kudo di pacu kancang-kancang
Pakiaknyo sajo nan tadanga
Dek inyo mamakiak kuaik nantun
Takajuik urang di rumahnyo
Maliek urang dari tingkok
Bakato sanan Angek Garang
Mano diak sayang Mayang Taurai
Usah Upiak mamakiak juo
Malu kito pado rang banyak
Kok Upiak elok-elok sajo
Ndak ado urang kan heran
Mancaliak kito nan baduo
Dek urang baganti lapiak
Bia alun kito baralek
Sudah biaso tu diak sayang
Dek urang bajalan baduo
Elok-elok Upiak duduak
Bagantuang pado lihia ambo
Buliah kudo kito pakancang
Jan sampai hari malam bana
Kito sampai di Koto Lamo
Lah labiah garan ampek bulan
Sajak matinyo kakak Upiak
Kakak ko iyo ingin bana
Untuak mambawo Upiak pulang
Jo kudo saroman iko kini
Kiniko baru sampai taragak
93
