Lorong kapado Sutan Parmato, bakato kapado siGadih Ranti, “Tinggalah Adiak dahulu, ambo babaliak ka Padang, lakeh babaliak pulang,” bakato baibo hati, kasiah nan jolong basusuak.
Hari sapagi pagi itu, naiak bendi Sutan Parmato, sarato mandeh jo adaiknyo, si Ranti maanta jo mandehnyo, sarato kawan duo tigo, rami urang maantakan, bak malapeh urang ka Makah, ampek bendi dipakainyo, kudo balari bak ka tabang, mangaja kureta pukua salapan, kureta apinan ka Padang, sarupo bendi pacu darab.
Ado sabanta antaronyo, lah tibo ditasiun Bukiktinggi, turun bagageh ka tasiun, kan iyo mandeh si Salamah, sarato Salamah jo Parmato, naiak sakali dalam kureta, ado sabanta antaronyo, babunyi lonceng tigo kali, bakato Sutan Parmato, “Tinggalah mandeh jo Ranti.”
Manjawab mandeh si Ranti, "Usah lamo Sutan di Padang, lakeh Sutan babaliak pulang," katonyo mandeh si Ranti, lorong kapado si Ranti, maliek laki lah bajalan, limbak laruik ayia mato.
Luruih jalan ka Cupak
Basimpang jalan ka Palupuah
Ka kida jalan ka Pulasan;
Bakapimamakan dadak
Didalam hancua luluah
Dilua tidak mangasan.
Kok tidak malu jo urang banyak, namuahmanuruik ka Padang. Babunyi lonceng tigo kali, kureta bajalan hanyo lai, kan iyo siGadih Ranti, diliek kureta sampai hilang, lah hilang kureta dari pandangan, baru babaliak inyo pulang.
Kureta bajalan kancang, duo buah induak masinnyo, kununlah Siti Salamah, tacangang-cangang dalam kureta, bak kabau takajuik di aguang, asiang urang balain awak, maliek adiak bak cando itu, tagalak surang Sutan Parmato.
90
