Dek lamo lambek ateh kureta, kiro-kiro pukua duo, tibo kureta di tasiun Padang, turun urang ateh kureta, turun pulo mandeh Parmato, diiriang anak si Salamah, dibaok mandeh ka ateh bendi, duduak batigo di dalamnyo, kudo dilacuik dek kusia bendi, kudo manduo lari kancang.
Kan iyo si Salamah, sarato mandeh kanduangnyo, tidak lapeh matomamandang, maliek rami Kota Padang, ado sabanta antaronyo, baranti bendi di laman toko, turun sakali Sutan Parmato, sambia bakato ka mandehnyo, “Naiak ka loteng mandeh dahulu, baoklah Salamah ka ateh.”
Herantacangang mandeh Salamah, maliekgadang toko nantun, diliek pulo di ateh loteng, basusun meja jo kurisi, tampek tidua duo buah, iyolah ranjang kui basi, pakai kulambu kain suto, diliek pulo ka dindiang, tampak pulo camin gadang, sarato jam nan tagantuang.
Maliek rupo rumah anak, sarupo rumah urang bapangkek, heran tacangang mandeh Salamah, mamikiakan kayo anaknyo, tidak duto urang bakato, bahaso Parmato sangaiklah kayo, duo buah toko gadangnyo, panuah barisi kaduonyo.
Lorong kapado mandeh Parmato, sarato Salamah adiak kanduang, duo bulan mandeh di Padang, duduak-duduak basuko tiok hari.
Kan iyo siGadih Ranti, dijapuik pulo dek Parmato, manatap tingga di Padang, hiduik basuko tiok hari, ado duo tahun pambauran, lahia anak laki-laki, baru baranak si Gadih Ranti, sanang hati Sutan Parmato, ubek jariah palaraidamam, sidingin tahampa di kapalo.
Balayia kapa dari Semarang
Banyak mambaok kain suto
Balabuah tantang Pariaman;
Baitu kaba kato urang
Duto urang ambo indak sato
Bohong urang ambo tak sinan.
92
