“Cubadak tangah laman
Dijuluak jo ampu kaki;
Usah lamo tagak di laman
Itu cibuak basuahlah kaki.”
Manjawab si Sariamin,
“Mangko den pai ka pakan
Sagan den pai ka sawah;
Mangko den tagak di laman
Den sangko Kakak indak di rumah.”
Alah naiak si Sariamin, duduak basimpuah tangah rumah, diambiak siriah dalam uncang, uncang biludu sirah tuo. Bajambua babanang ameh, baukia basuji suto pelang, sanan bakato si Sariamin,
“Bukan den kinari sajo
Kinari nak rang Padang;
Bukan den ka mari sajo
Gadang mukasuik ka dijalang.”
Manjawab si Rawani,
“Gadang aia dari hulu
Tarandam batang timah-timah;
Oi kakak duduak dahulu
Lapiak takambang tangah rumah.”
Bakato si Sariamin,
“Rami pakan di Rambatan
Rami sampai patang hari;
Kakak manaruah ayam kinantan
Ambo suko mamauik pulang.”
Alah sudah bapantun, bakato si Sariamin, “Manolah Kakak mandeh si Saman, lorong kapado badan ambo, ambo disuruah disarayo, iyo dek mandeh Fatimah, sarato sarapek niniak mamaknyo, sarato bapaknyo Pakiah Sutan.
20
