Iyo mukasuik dalam hati, sudah hajat sajak dahulu, alah taniat sajak ketek, manjapuik si Bujang Saman, ka junjuangan si Gadih Ranti, kandak kami usah ditulak, banyak pulo urang nan datang, mamintak si Ranti ka kawan anaknyo, surang tidak inyo nan suko.”
Mandanga kato nan bak kian, galak bagumam Siti Rawani, inyo tahu si Ranti, urang elok baso pun baiak, roman rancak budi pun elok, sangaik suko dalam hati.
Tapi sungguah nan bak kian, di muko tidak mangasan, sanan bakato Siti Rawani, “Lorong kapado si Bujang Saman, urang tinggi di ruwehnyo, aka tidak bana pun tidak, umua nan baru satahun jaguang, darah nan baru satampuak pinang, urang nan bodoh baru, kok manyasa Kakak kamudian, elok nan lain kito cari, samo sacari malah kito.”
Mandanga kato nan bak kian, bakato si Sariamin, “Kok itu kato Kakak, usah Kakak rusuah bana, manuruik pandangan dari kami, lorong kapado si Bujang Saman, urang cadiak candikio, baitu mudo matah baru, lah pandai bakadai di Padang.”
Manjawab mandeh si Saman, “Kalau baitu kato Kakak, bari bapikia ambo dahulu, dibaok baiyo jo mamaknyo, sarato bapak si Bujang, mananti Kakak sakutiko, hari Sinayan Kakak babaliak, di sinan tantu lai indaknyo.”
Mandanga kato nan bak kian, sanang lah hati si Sariamin, sanan bakato maso itu, “Itulah kato sabananyo, mupakatlah Kakak dahulu, mupakat nan ka lai, usah dibari kato harok, kami nan harok manantikan.”
Alah sudah rundiang barundiang, nasi ditatiang dek si Salamah, adiak kanduang si Bujang Saman, sanan bakato si Sariamin, “Lorong kapado minum jo makan, ambo nan baru sudah makan, indak dapek ditambah lai.”
Lah panek tangka batangka, turun juo si Sariamin, turun babaliak pulang, hati di dalam sangaik sanang, kandak raso lai babari,
22
