pintak raso lai ka buliah, sanang hati si Sariamin, bajalan bagageh-gageh, bajalan maadok pulang.
Alah sarantang pajalanan, cukuik kaduo rantang panjang, hampia ka tibo hanyo lai, alah tibo garan di sinan, iyo di laman rumah si Ranti, tampak mandeh di laman, sadang manjamua jo si Ranti.
Alah tibo di laman rumah, disongsong dibaok ka rumah, hati di dalam harok cameh, harok raso ka babari, cameh raso tak ka buliah, diiriangkan ka dalam rumah.
Alah tibo di dalam rumah, disorongkan siriah di carano, alah sudah mengunyah siriah, sanan bakato si Sariamin, “Ruponyo kandak laika balaku, pasanang sajo hati Kakak, insya Allah laimukabua, hari Sinayan ambo babaliak, disinan dibaok saluak tando.”
Mandang kato nan bak kian, sanang hati mandeh si Ranti, sajuak pikiran maso itu, alah sahari duo hari, lah tibo hari Sinayan, takana janji nan dikarang.
Kan iyo si Sariamin, disikek rambuik di kapalo, dipakai kain nan barasiah, dibaok pulo kain tando, kain tando kain balapak, tanunan urang Koto Gadang, dijenjeng siriah dalam uncang, bajalan ka rumah mandeh si Saman.
Kok untuang elok palangkahan, dituruik labuah nan panjang, alah sarantang pajalanan, cukuik kaduo rantang panjang, hampia ka tibo hanyo lai, iyo di rumah mandeh si Saman, lah tampak Siti Rawani dalam rumah, dikambang lapiak pandan putiah, ado sabanta antaronyo, nasi ditatiang dek Salamah.
“Manolah Kakak makan dahulu, indak dapek Kakak batangguah, nasi talatak mintak dimakan, ayia dicerek mintak diminum.”
Lah makan si Sariamin, baduo jo mandeh si Saman,sadang makan batutua juo, alah sudah makan jo minum, dikunyah siriah sakapua surang.
24
