Sanan bakato mandeh si Saman, “Kalau baranti lapeh arak, kalau batutua sudah makan, ruponyo kandak ado balaku, pintak lai babari, sapakaik mamak si Saman, baitu juo bapaknyo, samo katuju kasadonyo, bahati suko mamak jo bapak.
Lorong kapado nan mamakai, iyo anak si Bujang Saman, mujua pulo inyo pulang, lai suko manarimo, kok untuang salamaik pambauran, sampai mandapek anak pinak.”
Mandanga kato nan bak kian, sanang hati si Sariamin, kok payah lai badaso, bakato si Sariamin, “Manuruik adat nan bapakai, iyolah warih nan bajawek, tarimo tando kabek arek,” dikaluakan kain nan balapak, dibarikan ka Siti Rawani, dek mandeh si Saman, dibaluak tando jo karih ameh, karih pusako mamak kanduang.
Alah sudah babaluak tando, ditakuak janji ka kawin, tigo hari timbua bulan, kiro-kiro sabulan lai. Kok padan alah baukua, janji alah bakarang, sananglah hati kaduonyo, kan iyo si Sariamin, manti nan pandai bijaksano, bajalan babaliak pulang.
Birawari Siti Rawani, mandeh kanduang si Bujang Saman, duduak bamanuang sakutiko, ado sabanta antaronyo, tadanga suaro si Saman, diliek anak ka rumah, duduak baselo tantang tunggak, bakato mandehnyo maso itu.
“Manolah ang Bujang Saman, tigo hari bulan di muko, di sinan nikah anak kanduang, kiro-kiro sabulan lai.
Karano hari lai lapang, pailah anak ka rumah bako, bako ang si Jawair, mamintak izin pai ka rumah, iyo ka rumah si Gadih Ranti, anak kanduang Siti Fatimah, elok-elok kalau batutua, pandai-pandai kalau mangecek, turuik bako ang duo tigo.”
Lorong kapado si Saman, urang mudo masak pangaja, sangaik hormat ka nan tuo, bakato balunak lambuik, muluik manih kucindan elok, awak rancak baso pun baiak, jarang rang mudo saeloknyo, tahu di untuang jo bagian, indak suko bagurau-gurau, anak tanang akanyo dalam.
26
