Titian Barakuak
Kaba bakisa ka si Ranti, sajak lah sudah saluak tando, Ranti ka kawin bulan di muko, kok rumah dipeloki, patuik disisiak lah disisiak, patuik diganti alah diganti, tukang tak hanti karajo.
Diliek pulo nan gadih-gadih, rintang manjahik jo manyulam, ado nan mangarang bungo, satangah membuek kue, kakok buatan surang-surang, buni galak badarai-darai, ado bagarah bakucindan, maklum anak mudo-mudo, hati gabuak pikiran sanang, tidak ado bahati susah.
Ado sabanta antaronyo, ka rumah Angku Kapalo, takajuik urang nan banyak, diansua turun balambek-lembek, sanan bakato Angku Kapalo, “Di mano garan Datuak Batuah, lai inyo ado di siko?”
Manjawab mandeh si Ranti, bakato sadang manggigia, takuik maliek Angku Kapalo, “Kok itu Inyiak tanyokan, baliau lai nan disawah, buliah denai japuik kini juo,” bakato sadang bajalan, bajalan turun ka laman, lah balari-lari ketek, mahimbau dunsanak kanduang, hati di dalam indak sanang.
Kan iyo Angku kapalo, duduak bajuntai di kurisi, disorong siriah dek si Ranti, “Makan Inyiak dahulu, malakik mandeh denai pulang.”
30
