kambang, kalau sapakaik kato nangko, usah Datuak batangguahtangguah, baitu juo jo si Fatimah, tarimo ambo jadi sumando, mato baniah urang Guci, sabab ambo bakato nantun, sudah taniat sajak dahulu, manjadi karik jo Datuak.”
Mandanga kato nan bak kian, tapancak paluah Datuak Batuah, mangaluah mandeh si Ranti, dirameh paruik dikampihkan, sanan bakato Datuak Batuah.
“Manolah Datuak Angku Kapalo, Sumarak Alam Sungai Talang, lorong kapado pintak Angku, baribu kali ambo suko, sudah pulo di tampeknyo, indak ado salah bandiangnyo, mamintak sudah di tampeknyo, lah patuik ka suami si Ranti, junjuangan dunia akhirat, tapi sungguahpun nan bak kian, maaf dimintak pado Angku.
Lorong kapado si Ranti, sudah dalam talangkai urang, batunangan jo si Bujang Saman, anak dek Angku Guru Gadang, anak Rawani urang Tanjuang, kok tak ado maro malintang, hari Jumat inyo manikah, kiro-kiro duo puluah hari lai, indak dibukak buhua, sudah ado takuak tando, saba Angku tantang itu, garak di dalam tangan Allah.”
Mandanga kato Datuak Batuah, lah sirah padam muko si Gaek, manjawab Angku Kapalo, “Lorong kapado janji nantun, janji buatan nan dikarang, titian biaso lapuak, kok janji biaso mungkia, kan sudah manjadi adat, kalau dilipek tando nantun, barapo lipek ambo mambayia, ungkaikan tando jo urang itu, lah duo puluah ambo babini, Datuak sajo nan manulak.
Ingek-ingek malah Datuak, ambo nan bukan sambarang urang, Angku Kapalo dalam nagari, kalau batumpuak Sungai Talang, buliah den jenjeng den hampehkan, ambo mahitam mamutiahkan!” mambangih manyirah mato, balari turun ka laman, barapo dabua tapak kaki.
Maliek rupo nan bak kian, susahlah hati Datuak Batuah, nan labiah bana mandeh si Ranti, bangih jo banci ka si Gaek, tak tantu di
34
