tuo awak, samantang inyo Angku Kapalo, namuah marampeh anak urang.
Kan iyo si Gadih Ranti, manangih lari ka biliak, ayia mato badarai-darai, dirameh paruik dikampihkan, sasak angok manahan hati.
Pado bapadi sasukek
Elok padi sipuluik tulang;
Pado balaki jo urang gaek
Elok badan jadi tulang.
Lorong kapado Angku Kapalo, bajalan babaliak pulang, hati pado bak ampadu, bapikia-pikia surang, mancari lantai tajungkek, dibuek titian nan barakuak, sabalum dapek si Ranti, indak den lakilaki, katanyo dalam hati.
Dek lamo lambek bajalan, pikiran kusuik masai sajo, tidak taraso jauah bajalan, lah tibo di dalam kantua.
Maliek rupo Angku Kapalo, takuik hati Juru Tulih, bak kuciang dibaokan lidi, baitu juo rang jago gadang, sarato dubalang jo pagawai, surang pun tidak nan badatiak, takuik maliek Angku Kapalo.
Ado sabanta antaronyo, bakato Angku kapalo, “Mano waang Atin rang jago gadang, japuik tabaok si Saman, si Bujang Saman anak Rawani, baru pulang dari Padang!”
Kan iyo Pandeka Atin, tagak sugiro maso itu, bajalan balari anjiang, dek lamo lambek di jalan, nan dituruik batambah hampia, nan tingga batambah jauah. Ado sabanta antaronyo, lah tampak rumah si Saman, dituruik cando ka laman, tampak mandehnyo sadang manjamua padi, sanan bakato Pandeka Atin.
“Manolah Kakak Rawani, ambo disuruah disarayo, manjapuik si Saman datang ka kantua, paralu tabaok kini juo.” Mandanga kato nan bak kian, lah takajuik mandeh si Saman, tasirok darah di dado, apokah sabab karanonyo, mako dibaok anak
36
