saringgik surang, satangah mambari ampek ringgik, untuak mambuek rumah sikolah, sampai kini tidak basuo, ka mano pitih tu garan kini, labiah nan dari saratuih ringgik, baitu juo iyuran padi, kito turun sapuluah sikek, ado mambari nan sababan, pitih tasimpan di Angku Kapalo, padi baliau nan mangumpua, guno pambuek jambatan, jambatan nan di mudiak, lah ampek tahun sampai kini, pitith tidak ado bajajak, hilang tak tantu rimbonyo, mati tak jaleh kubuanyo.
Banyak rasio ka kito bongka, patuik inyo manjadi kayo, manyasok pitih anak nagari, mintak dituka Angku Kapalo, dicari pangulu nan lain, urang nan luruih lagi adia.
Lorong kapado karajo nangko, ambo surang mamikua, usah mamak takuik ganta, asa Mamak namuah sapakaik.”
Mandanga kato si Saman, galak tasanyum Datuak Palindih, “Lorong kapado mukasuik Rang Mudo, itu mukasuik sabananyo, gadang manfaat ka urang banyak, di ambo lai taraso, lah lamo manjadi agak-agak, jalan nan tidak dapek, bak si bisu barasian, takana lai takatokan tidak.”
“Kalau baitu kato Mamak, sananglah pulo hati den, asa Mamak lai manolong, manolong dalam batin, ambo di muko mangalang mariah, bia ka kantua Landeraaik, atau ka Jawa ka Betawi, ambo namuah mamayiakan, pasanang lah hati Mamak, tolong ambo di balakang,” katonyo si Saman.
Mandanga kato nan bak kian, sanang hati Datuak Palindih, di dalam Datuak sabanyak nantun, surang tidak ado nan manupang, samo sapakaik kasadonyo.
Alah sudah dicari mupakaik, jo niniak mamak sambilan suku, sarato pangulu nan banyak, dibuek surek pangaduan, dikirim kapado Tuangku Lareh, sarato Jaksa jo Angku Ajuang sampai kapado Tuan Kumandua.
Manuruik bunyi dalam surek, manuntuik pitih dangan padi, kami niniak dengan mamak, pangulu andiko dalam nagari, manuntuik
54
