kapado Angku Kapalo, Kapalo Nagari Sungai Talang, rajo lalim rajo disanggah, rajo adia rajo disambah.
Birawari Angku Kapalo, tabaun jajak si Bujang Saman, bahaso inyo alah pulang, disuruah Dubalang nan barampek, mangapuang rumah si Saman, baok ka rumah Angku Kapalo, itu parentah ditibokan.
Kan iyo Dubalang nan barampek, dituruik rumah si Bujang Saman, kiro-kiro pukua anam pagi, hari nan sadang pagi bana, satu tibo naiak ka rumah, dihimbau si Bujang Saman, barapo hariak dareh suaro, takajuik si Saman sadang tidua.
Maliek dubalang di laman, tidak tarago mambasuah muko, dituruik cando ka laman, sanan bakato Dubalang Kapalo, “Kami disuruah Angku Kapalo, manjapuik waang Saman, japuik tabaok kini juo, usah waang balalai-lalai, Angku Kapalo sangaik taragak, pataba sajo rusuak waang Buyuang.”
Mandanga kato Dubalang, haram hatinyo nak bakucak, galak tasanyum mamandangi, dikanakkan sarawa galembong hitam, dipakai baju ganiah putiah, dipacawek jo kain saruang.
“Kalau baitu kato Mamak, tu malah kito bajalan,” katonyo si Bujang Saman. Alah bajalan bacapek-capek, sudah maklum di dalam hati, kan bacakak jo dubalang, dek capek inyo bajalan, lah tibo di rumah Angku Kapalo, diliek Angku Kapalo, sadang duduak di kurisi, maminum kopi di cawan.
Sanan bakato Angko Kapalo, “Tutuik pintu kasadonyo, kito sudahi gadangnyo, inyo disuruah pai ka rodi, kironyo suruik pulang babaliak, ruponyo waang balelo hati, tidak patuah turuik parentah, kini tahan di ang kaki den…!”
Diujo langkah tigo, diayun jo kaki suok, kaki tibo disambuiknyo, ditulak jo tangan suok, tacampak Angku
56
