Kapalo, malanguah di bawah meja.
Maliek rupo nan bak kian, lah datang Dubalang nan barampek, siapo datang kanai kaki, kaki capek sarupo kilek, tangannyo barapirapi, tibo di pusek malanguahkan, banyak kurisi patah-patah, tarabah dindiang kanai kaki.
Surang lawan barampek, tiok disentak pisau sewah, dapek ditangkok dek si Saman, licin badannyo melompek-lompek, kakinyo kuaik manyipak, tibo di pintu pintu tahampeh, tibo di jendela kaconyo pacah, hilang aka nan barampek, tidak tahampia-hampia urang. Surang lah tabariang di ateh lantai, tangga giginyo kanai tinju, satangah matonyo pacah, ado kalua darah di harang, kanai kaki si Saman Palak, sinaruih Dubalang nan barampek, balimo jo Angku Kapalo.
Lorong kapado Angku Kapalo, ditanai urang ka dalam biliak, bunyi ratok babuah-buah, hiruak pikuak dalam rumah, tidak tahu nan ka didanga, rumah sarupo Cino karam.
Lorong kapado si Saman Palak, maliek rupo bakeh kaki, galak baginjuih turun ka laman, sadang dek Dubalang nan barampek, sudah takato urang bagak, guru urang dikalahkan, disangko si Saman urang lunak, urang saba jo pandiam, kironyo harimau maandokkan kuku, lai barisi anak nantun.
Lorong kapado Angku Kapalo, sajak ditangani si Saman, sapuluah hari tak pandai tagak, jikok duduak baduduakkan, kalau tidua batiduakan, rangkik sagalo pasandian, lah nyato awak urang gaek, dilawan pulo urang mudo, bak karakok mamanjek batu, hiduik sagan mati tak namuah, sudah azab dari Tuhan, doso banyak tapabuek, banyak tamakan di nan haram.
Hari buruak di Angaku Kapalo, sadang sakik parkaro tibo, datang Jaksa jo Angku Ajuang, Tuan Kumandua tibo pulo, cukuik jo upeh polisi, karano pangaduan urang kampuang, banyak maabihkan pitih rakyat, dipareso pulo buku kantua,
58
