buku kantua Angku Kapalo, banyak balasting nan tamakan, baitu juo urang rodi.
Putuih hukuman Tuan Kumandua, dirampeh harato Angku Kapalo, disita sawah ladang, dilelang ka urang banyak, inyo baranti mamarentah, Juru Tulih kanai hukum pulo, hukum panjaro satahun surang, karano saiyo jo Angku Kapalo.
Diangkek kapalo nan baru, pangganti Datuak Mangkuto Sati, Angku Kapalo nan luncua, iyolah Datuak Palindih, urang Sikumbang Sungai Talang, itulah urang nan cadiak, urang malin kuaik ka surau, umua nan baru tigo puluah, manulih mambaco lai pandai, panyayang ka anak buah.
Sajak baliau manjabat Pangulu Kapalo, banda di sawah banyak batambah, dibuek jambatan jalan ka mudiak, jambatan baru badindiang basi, sanang urang pai ka pakan, surau musajik sangaik rami, banyak bakurang urang pamain, maliang curi hampia tak ado, sanang hati urang kampuang.
Rami pakan Balai Sabtu
Banyak urang manjua kain;
Baraliah kaba tantang itu
Baraliah kapado nan lain.
Alang-alang urang Kinali
Bari baikua bakapalo;
Diulang saulang lai
Panjapuik kaba nan cako.
60
