Mamasak Etongan
Birawari Bujang Saman, sudah bacakak jo Dubalang, inyo bajalan pai ka Padang, kadaian lah lamo ditinggakan, dek elok laku anak samang, salamo galeh ditinggakan, tidak ado manaruah rugi, ado tampak galeh batambah.
Sanang hati si Bujang Saman, batambah sayang ka anak samang, anak bujang sangaik luruih, pandai manggaleh jo mambali, lagi pun pandai batutua, banyak urang nan maliek, urang manyangko adiaknyo juo, rauik roman kaduonyo, bak pinang dibalah duo.
Kan iyo si Saman, sadang duduak di kadaian, datang urang dari darek, samo gadang maso di kampuang, kawan sahilia jo samudiak, bakato kawan si Saman.
“Angku Kapalo lah batuka, baganti jo Datuak Palindih, baru baranti Angku Kapalo gaek, tawa rasonyo dalam kampuang, lah baranti nan manyeso, silangkaneh dalam kampuang, kacang miang urang nan banyak, baranti buruak baliau nantun, tasita sawah jo ladang, dirampeh sagalo pambalian, manuruik kato urang, pitih nagari banyak tapakai, urang dipakso baiyuran, untuak pambuek jambatan, lah tujuah tahun sampai kini, tidak ado tando betinyo.
Mandanga kato nan bak kian, tagalak-galak si Bujang Saman, lai barhasia jariah payah, untuak mengguliagkan Angku Kapalo.
62
