Hari sahari itu, dibali pakaian nan haluih-haluih, apo kahandak dapek sajo, maklum inyo urang kayo, dibaok kopor nan gadang, panuah barisi duo buah, pakaian mandeh jo adiaknyo, sarato pakaian si Gadih Ranti, dipiliah kain nan haluih, barapo harago indak ditupang, asa sasuai jo hati.
Sarikayo makan jo tapai
Makanan anak puani tanah;
Nan kayo mukasuik sampai
Nan miskin karam di tangah.
Hari samalam-malam nantun, sakalok tidak takalokkan, raso dikuyak hari ka siang, tadanga murai bakicau, bagageh mambasuah muko, dikanakkan pakaian bagageh-gageh, bendi mananti di laman.
Lah sudah barang naiak, naiaklah pulo si Bujang Saman, kudo dilacuik kusia bendi, lari manduo di tangah labuah, bendi mangaja kereta api, kureta api satangah anam, lari kudo bak ka tabang.
Ado sabanta antaronyo, tibo bendi di balakang tasiun, bagageh masuak kureta, dek elok palangkahan, babunyi lonceng tigo kali, kureta bajalan hanyo lai, tingga kampuang Kota Padang.
Kan iyo si Bujang Saman, sanang hati maso itu, diisok rokok nan sabatang, asok mandulang ka udaro, maliek juo ka lua, banyaklah kampuang nan tampak, baranti kureta tiok tasiun, urang banyak turun naiak.
Tibo kureta di Lubuak Aluang, baru taraso lapa badan, dimintak nasi duo bungkuih, sarato samba goreng ayam, dek lamak makan ateh kureta, habih nasi duo bungkuih.
Kureta api bajalan sangaik kancang, dek lamo lambek di jalan, lapeh nan dari lubuak aluang, handak manjalang padang panjang, lapeh pulo padang panjang, tibo kureta di bukittinggi.
Lah turun urang nan banyak, turun pulo si bujang saman, dihimbau kuli pambaok barang, dimasukkan kopor ke dalam bendi,
78
