↓Laman ko alah sah
Pai Mangaji
Hari nan sadang tangah hari, sadang bagalanggang matohari, sadang bunta bayang-bayang, sadang linduang saliguri, sadang litak letai anjiang, sadang ancik-ancik urang di ladang, sadang anok-anok unggeh, sadang langang urang di kampuang, sadang rami urang di balai.
Pado maso itu, takana bana dek amai si Umbuik Mudo, bapantun-pantun surang, apolah bunyi pantunnyo:
- “Siambek buah siambek
- Diambiak rang manjaja;
- Badan denai batambah gaek
- Anak nan balun bapangaja.
Nak duo pantun sairiang, apolah buah pantunnyo,
- Taratak talut-talutan
- Talatak di dalam padi;
- Oi anak ka mari denai katokan
- Supayo anak buliah diajari.”
Turunlah si Umbuik Mudo, dari anjuangan mahligainyo, sarato tibo inyo batanyo, “Oi amai joden di amai, apokoh kaba dangan barito?”
2
