Atau hanjo akan sabuah, ado dek ajah nan maraso, nan takana dalam hati, patuik diusua dipareso, adok kadiri badan anak. Kito nak barundiang2, sabuik manjabuik nan taraso, duduak barundiang bahadapan, djo diri mamak kanduang ang. Kaba barito hambo dapek," dari tuan Datuak Andiko, bujuang manjabuik nak badjalan, hati nan tunggang nak karantau, nak mauni koto urang. Manuruik pikiran ajah, rantjak pulo maaliah langkah, manuka2 pamandangan, sambia mantjari2 raso, tapi bukan bak bujuangko, Urang baduo. batigo, lai nan pai banan tingga, atau tungga pinang sabatang, tak ado ibu djo bapak, lah habih kakak djo adiak, dirumah hiduik tak santoso. Tapi didiri badan bujuang, ibu tuo ajah lah gaek, anak tungga pinang sabatang, karanap karantau urang, pikia lah bujuang dalam2. Kok malang tibo, dikami, dapek sangketo tak disangko, atau kok sakik ngilu paniang, tjondong sialah kamanungkek, rabab siapo managakkan, aduah sialah kadihimbau, timbang dek bujuang baiak².
Itu nan labiah ajah rusuahkan
Elok djo buruak kabasuo
Rantjak bapikia lah Landjungan
Sasa kudian tak paguno.
Mandanga pikiran ajah kanduang, djauah balain dari mamak, kato barisi djo nan bana, ijo tasuo kasamonjo, lah sulik manjabuik raso, tahambek dek raso batin, hubungan anak djo ajab, tali rahim djo ibu bapak, rumik Landjungan dek bapikia. Tapi samantang pun baitu, paham nan tidak njo suruakkan, walau bak mano mambedonjo, sabab djo ajah kanduang diri, tak guno batin dilinduangkan. Malah disabuik kato hati, dilahiakan nan. isi paham, kok pandjang bialah nak bakarek, balabiah baitu pulo, lai ajah kamangguntiang, djadi pitundjuak djo pangadja, kaawak djuo paidah njo. Lah habih bimbang djo ragu, barani karano bana, kok takuik karano salah, tak guno bapikia pandjang, mandjawab Sutan Landjungan:Templat:Left
