Inyo tantu bapikia pulo
Manyuruah urang ka mari
Maraso lai kaditarimo
Lai patuik manuruik alua
Ado patuik manuruik adaik
Lai pulo sapadan rupo
Sarato sapadan kadudukan.
Koknyo maraso ka ditulak
Indak nyo kamandakek
Dek itu barupo malu
Malu gadang dalam nagari.
Gantosari: Mandeh kanduang dangakan kato
Mande ambo mande Rubiah
Mande Rubiah rang Batipuah
Tolong sampaikan pasan ambo.
Ambo bapasan kini nangko
Bukan bakeh Ande Tuo ambo
Andeh Tuo Putí Ameh Urai
Tidak kapado bapak tuo
Pak tuo Datuak Marajo Lelo.
Ambo bapasan pado tuan
Tuan ambo Sutan Tumangguang
Nan disabuik Rancak Dilabuah
Tamusamahua kamano-mano.
Kok rancaknyo alah mah nyato
Tampannyo alah ambo liek
Anggun gombang dipandang mato
Jaranglah rajo ka tandiangannyo.
Tapi ambo nan buruak ko
Indak arok dirancak urang
Indak tadayo dek tampan urang
Ambo mancari tampek basanda
Bak siriah mancari junjuang
Halaman:Sutan Tumangguang Nan Rancak di Labuah.pdf/100
↓Laman ko alah sah
