Datuak Tumangguang: Itan inyo agak ka tapi.
Di kandang nan agak gadang
Sakiknyo parah mah tampaknyo
Mungkin mananti kau sajo
Lah ciek-ciek mah angoknyo.
Balari ka sanan Ameh Urai.
Di turuikkan dek Gantosari
Tampak si Rancak sadang manangih
Dakek kapalo Samburani
Nan sadang maragang angok.
Ameh Urai: Tau juo ruponyo buyuang
Mande lah datang dari kampuang
Bajalan malalı anak sayang
Mande lapeh jo ati ibo.
Mati elok tu mah nak kanduang
Mati mambela dunsanak ang
Kok indak lihia ang kanai parang
Tantu lihia nyo nan ka putuih
Inyo manyuruak di balakang.
Dari ketek mande gadangkan
Baduo dengan Balang Candai
Indak diracak indak dipakai
Sangajo Buyuang dimanjokan
Untuak panganta marapulai
Untuak panjapuik anak daro.
Samburani maringih sakali lai
Lalu manariak napeh panjang
Angok bajalan nyo ka langik
Indak kan ado baliak lai.
Tapakiak Rancak Dilabuah
Dipaluaknyo kapalo Sambarani
Dicium diidu barapo kali
Kudian baru dilapehkan.
159
