Parampok kuek tahan basi
Lai inyo tamui juo.
Ameh Urai: Manolah mamak kaduonyo
Apo kaba mamak tu kini
Ado ko kanyang makan mamak
Ado ko nyanyak tidua mamak.
Urang parampok: Baapo lalok ka lamak
Bak mano makan nan ka lamak
Lalok diganggu antu banyak
Antu urang nan lah dibunuah
Makan tasakek di rangkuangan
Badan dikaja panyasalan.
Nan katuju kini ko Puti
Nan dikandak iyolah mati
Mati tu bana indak amuah datang
Tidak mati mamakan racun
Indak ancua dagiang dek parang
Ditembak jo badia indak mati.
Baanyo kami nak maminto
Tuhan ndak tau bakeh kami
Kamipun ndak pado Tuhan
Indak panah kami mangaji
Sakali juo ndak sambahyang.
Ameh Urai: Dalam panjaro isuak garan
Buliahlah mamak tu baraja
Iyo sambahyang jo mangaji
Sarato baama jo puaso
Pokoknyo mamak lai namuah
Tuhan kito manarimo tobaik.
Parampok: Maminto kami pado Puti
Usah masuakkan kami garan
Iyo ka dalam panjaro tu
Elok dipakai kuek kami
Page:Sutan Tumangguang Nan Rancak di Labuah.pdf/170
↓Laman ko alah sah
