XVI. PANUTUIK ALEK GADANG
Kini basambuang pulo kaba
lyo kaba di Koto Lamo di Batipuah.
Urang bakameh nak baralek.
Alek gadang nan diadoki
Rancak Dilabuah nan bagala St. Tumangguang
Kapulang ka rumah Gantosari
Puti tanamo di Pandai Sikek.
Banyak tadanga bisiak-bisiak
Banyak urang mangecek-ngecek
Tantang alek nan ka dibuek
Alek lah lamo mah tasabuik
Kini baru ka dilangsuangkan
Urang alah tananti-nanti.
Tantang urang nan ka baralek
Samo kayo samo tanamo
Samo gadang digadangkan
Samo masahua di alam ko.
Dek Sutan jo Puti nan ka kawin
Samo tasabuik yo rancaknyo
Dari Sutan, Puti nan lain.
Ado pulo sabuah lai
Nan mahebohkan urang banyak
Alek kamba nan ka dibuek
Iyo dek Puti Ameh Urai
Anak nyo duo samo gadang
Si Rancak jo si Buyuang Geleang
Ka samo tarun kaduonyo
Surang dari anjuang ameh
Nan surang dari ajuang perak.
174
