Baitu pulo ambun Suri
Urang Nagari Pandai Sikek
Gadihnyo duo samo gadang
Ka’naiak lamin kaduonyo
Surang di anjuang suok
Surang di anjuang sabalah kida.
Tigo ari tigo malam
Urang baduduak-duduak urang
Urang marancang marancano
Barapo gadangnyo alek
Barapo pulo kalamonyo
Barapo kabau jo jawi
Kadicari kadibali.
Barapo ratuih ayam jo itiaknyo.
Ditantukan pulo itu garan
Siapo isi pangka alek
Siapo Rajo Gumanti
Siapo pulo Rajo janang
Barapo banyak kasadonyo
Mak jaleh buek kadikakok.
Sagalo urang nan ka diangkek
Alah mah duduak itu garan
Dirapek wakatu duduak urang
Tamasuak tuanku tuan Gadang
Nan samayam di Batipuah Ateh
Urang gadang dari daulu
Harimau Campo Minangkabau
Kato baliau nan ka didanga.
Pandai baliau nan ka dituruik.
Lah salamo salaruik iko
Alun panah baliau ka tangah
Manjadi sipangka alek
Taunyo duduak di bawah tirai
Mananti sambah urang banyak.
175
