Lah lamo bana itu garan
Sajak baliau naiak nobaik
Sajak baliau barumah tanggo
Indak ado alek nan gadang
Di rumah Gadang nan di ateh.
Nun sakali kini nangko
Baliau bana manduduakkan
Urang-urang nan bakuaso
Nan duduak di rumah gadang
Rumah Gadang di Koto Lamo
Baliau pulo manatokkan
Baliau jadi pangka alek.
Sagalo alaik kabasaran
Payuang kuniang payuang panji
Sarato tombak janggui janggi
Nan ado di istano Tinggi
Rumah gadang nan baukia
Pindah sadonyo ka Koto Lamo.
Kunci ameh kunci perak
Alah badariang kasadonyo
Pambukak peti nan banyak tu
Peti basi peti tambago
Peti Baukia aia ameh
Alah dibukak kasadonyo
Diambiak pakaian Sutan-sutan
Untuak dipakai marapulai.
Pakaian rajo jo pangulu
Kalua pulo itu garan
Ka di pakai dek si Pangka nan banyak tu
Baitu pulo pakaian puti
Puti mudo Puti tuo
Alah basusun ka dibao
Ka rumah gadang Koto Lamo.
176
