Carano indak cukuik ciek
Dikumpua sagalo nan ado
Nan baukia nan barendo
Baitu pulo talam-talam
Indak taetong tu banyaknyo
Ado nan tinggi ado nan randah
Ado pulo nan baukia
Nan barendo di tapinyo.
Sibuaklah urang kasadonyo
Laki-laki parampuan
Mangakok adok masiang-masiang
Mancari barang nan paralu.
Paja-paja nan gadih-gadih
Manjamua manumbuak jo manampi
Iyo di laman rumah gadang
Rang mudo nan laki-laki
Mancari kayu ka di baka
Mancari talang untuak lamang
Daun anau nan putiah-putiah
Disuruah pulo nyo mangumpua.
Di malam hari itu garan
Iyo di waktu tarang bulan
Manumbuak di laman rumah
Di lasuang panjang tujuah lubang.
Bunyi alu bakatentong
Bunyi galak badarai-darat
Bujang manonton dari jauah
Sambia mamancak main padang.
Banyak pulo nan barani
Inyo basaluang jo basuliang
Bapantun manyindia-nyindia
Manyindia gadih nan banyak tu
177
