180 Lah sampai garan wakatunyo Lah sudah sagalo alaik Duo baleh ari bulan naiak Patang Kamih malam Jumaik. Pada maso dewaso itu Lah rami urang di rumah gadang Tirai tapasang suok kida. Batabia balangik- langik Kaduduakan rajo maso dulu. Rumah gadang tarang bandarang Baratuih lilin dipasang Lah panuah garan rumah gadang Lah duduak Datuak jo pangulu Tamasuak Tuanku tuan Gadang Harimau campo Minangkabau. Rajo nan dari Pagaruyuang Datuak Bandaro Sungai Tarab Datuak Mangkudun Rang Sumaniak Tuan Kadi dari Padang Gantiang Tuan Andomo dari Siaso Alah mah adia kasadonyo. Sabab Tuan Gadang nan maundang. Tuanku Rajo Duo Selo Dari Buo Sampua Kuduih Bialah agak jauah Tapi lah tampak duduak juo. Ado pulo saurang lai Iyo Tuanku St. Rajo Mudo Rajo nan dari Palabihan Datang jo datuak jo mantinyo Maalum urang badunsanak iyo jo inyo St. Tumangguang Sarato St. tangah Ari.
