Buruang pamenan lah di tangan
Buah idaman di rangkungan
Basyukua kito pado Allah.
Elok-elok buyuang dijalan
Samantang doa lai makabua
Usah ati dipatinggi
Jangan ado sipaik takabua
Indak kan patah dek marandah
Indak kan bungkuak dek manyuruak
Urang takabua udhu Allah.
Mano nak sayang Buyuang Geleang
Bajalan malah anak kanduang
Sampai kasiah kasahabaik
Sampai sayang kadunsanak
Ka bukik samo mandaki
Ka lurah samo manurun
Nan barek samo dipikua
Nan ringan samo kalian jinjiang
Dek sayang Tuhan kakalian
Samo naiak palaminan
Sananglah pulo ati ande.
Rombongan bajalan maso itu
Tandu diusuang urang banyak
Bapuluah kudo manuruikkan
Baduo urang manunggangnyo
Pandeka balari-lari
Dubalang malangkah panjang.
Dek jauah rantau nan dijalang
Dek urang bajalan kaki
Lah lewaik itu diniari
Lah ampia subuah itu garan
Baru nampak suluah nan banyak
Baru tampak ranah Pandai Sikek
191
