Puntuang abih nasi ndak masak
Karambia dibatuah balah duo
Untuang abih badan di talak
Ulah ndak patuah ka mintuo.
Alah sudah tu bainai
Dibao baliak ka ateh anjuang
Tuanku kadi alah hadia
Nan kamanikahkan kaduonyo
Dibaconyo doa agak saketek
Dibaco pulo akaik nikah
Iyo dek rajo Sidi Marajo
Ditarimo nikah dek Gantosari
Dek inyo Datuak Tumangguang mudo
Ameh kawinnyo galang padu
Nan barek tangah duo tahia.
Dibaco sakali lai
Iyo dek bapak Intan Sari
Ditarimo Datuak Rajo Gumanti Mudo
Ameh kawinnyo galang juo
Iyo nan barek satu taia.
Lah sudah pulo akaik nikah
Sambah manyambah rajo Janang
Sarato Rajo Gumanti
Manyambah maminto makan minum
Kapado alek kasadonyo
Iyo nan datang jo mananti.
Alah pulo minum jo makan
Siriah alah pulo dikunyah
Manyambah si Pangka dari Batipuah
Maminto diri itu kini
Rantau nan jauah ka dijalang
Hari lah ampia tangah ari.
Pado ari barisuaknyo
195
