Datanglah pulo urang banyak
Datang manjapuik manantunyo
Nan pulang ka rumah ande
Alun baliak ka Pandai Sikek.
Pado maso katiko itu
Dek alek sadang raminyo
Urang datang yo rami pulo
Indak tamuek di rumah gadang
Di balairung urang makan
Balairung Sari timba baliak.
Lah sudah pulo minum makan
Barangkek pulo rombongan itu
Alah tabao mah manantu
Duo tandu panuah dek urang
Tuanku Gadang sipangka alek
Sarato puti Batipuah Ateh
Rajo-rajo jo putinyo
Samo naiak ka ateh tandu
Ditanai rakyat nan banyak tu.
Nan mamikua tandu tu garan
Bukanlah urang nan diupah
Anak kampuang sasuko ati
Barabuik inyo nak mamikua
Buliah masuak ka dalam alek.
Bunyi aguang mandanguang-danguang
Bunyi tabuah badantum-dantum
Kok iyo sadang bararak tu
Indak diguguah dek rang mudo
Karano dek pai kasadonyo.
Tapi untuak nan gaek-gaek
Itu pulo maso basuko
Alah diulang kaji lamo
Mamancak basilek main padang
196
