Sarato sarawa jo detanyo
Sampiang salendang iyo pulo
Pambarian Puti Gantosari
Waktu inyo batunangan.
Alek nan bakun sudah lai
Baujuang pulo mah saketek
Bapakai pulo anak daro
Jo marapulai kaduonyo
Pai manjalang inyo kini
Manjalang ka rumah gadang
Rumah gadang Batipuah Ateh.
Nan sakali kini nangko
Indak lai sato nan tuo-tuo
Alek rang mudo itu garan
Abih bakudo kasadonyo
Kudo diracak marapulai
Anak daro di balakangnyo.
Kudo dibari bapalano
Palano kain balapak
Dibari baumbai-umbai
Baumbai jo banang makau
Si Kinantan dibao pulo
Akan disabuang inyo nanti
Disabuang indak pakai taruah.
Iko alek nan dinanti
Iko alek nan ditunggu
Iyo dek urang mudo-mudo
Alek urang maintai gadih
Alek urang mancari jodoh.
Lah sampai urang di laman
Basorak sorai kasadonyo
Bak urang baliak dari parang
Dek parang mambao manang.
202
