Tasabuik dikaba itu garan
Pado malam sasudah itu
Ramilah urang di alaman
Urang mudo kasadonyo
Bulan tarang langik barasiah
Bintang panabua banyak pulo
Suluah gadang suluah minyak
Lilin bapuluah di balerong.
Urang mudo bamain randai
Sarato main pancak silek
Di balerong gadih jo rando
Dicampua ciek duo
Jo urang nan baru kawin
Manari piriang, tari salendang
Manuruik ragam masiang-masiang.
Ganti-baganti itu garan
Caro bamain tangah laman
Kok urang mudo barandai jo manari
Mancaliak gadih dari balerong
Lah abih tagak kasadonyo
Di balerong suok kida.
Sabaliaknyo baitu pulo
Kok rang gadih nan manari
Bujang tagak bakuliliang
Sambia bagandang jo batapuak.
Kok panek inyo manari
Inyo basaluang jo basuliang
Gadih badendang di balerong
Baitu sampai diniari.
Lah tampak urang tuo
Baarak-arak ka mansajik
Barulah alek ka ditutuik
lyo dek Datuak Tumangguang Mudo.
210
