Urang nan mahie pancak silek
Sarato pandeka Rajo
Urang nan tau tuah ayam.
Kok kami nan pai ka rumahnyo
Mungkin indak nyo dangakan
Takuik jariahnyo indak kababayia
Sagan payahnyo indak kabaupah.
Mande: Jokok baitu kato kalian
Ariko juo denai pai
Barisuak kalian baraja
Alahkok sanang dalam ati.
Tasabuik Puti Ameh Urai
Mande Bujang Rancak Dilabuah
Urang rancak babudi baiak
Urang kayo suko dimakan
Lai cadiak candokio
Sarato arih bijaksano
Urang gadang sagan padonyo
Baitu urang kampuang.
Pado maso waktu itu
Agak tasentak tu mah garan
Iyo tajago dari lalai
Takana kasalahan anak kanduang.
Si Bujang rancak Dilabuah
Tapikia pulo salah awak
Nan lalai salamo nangko.
Anak surang tungga babeleang
Nan ketek tidak nan ka gadang
Siupiak si Buyuang inyo surang
Dikapik ka ilia ka mudiak
Dikundang sapanjang ari
