Dangakan juo kato denai
Tantang badan den situoko
Alah tadorong tu mah kini
Lah turun tarih nak manyisiak
Tagarubuih baru ka malantai
Lah sampai ka medan parang
Baru takana padang nan tingga
Alah tibo di tapi sawah
Kironyo pangkua tingga di rumah.
Pandeka Rajo: Jiko baitu kato ande
Alah tabayang tu dek ambo
Alah takacak tapi lapiak
Ande datang ka minta tolong
Mamimpin mamak mudo ambo
Iyo inyo Sutan Tumangguang.
Kami lai mandanga juo
Baso urang mancang galanggang
Ado kami maliek jauah
Indak barani doh mandakek
Awak bukan urang undangan
Heran pulo kami garan
Mangapo mamak mudo kami
Indak sato dalam galanggang.
Tantang dek urang nan banyak tu
Iyo bapakaian rancak-rancak
Maklum Sutan rajo-rajo
Indak doh ado nan manariak
Indak tabik salero mamandang
Ado nan pendek randah rindin
Lai nan tinggi janjang talang.
Ado nan gapuak tambun dagiang
Ado nan kuruih tampak tulang
Ado nan lah tuo bangka
Lai pulo nan paja-paja.
35
