Tantang mamak Sutan Tumangguang
Nan bagala Rancak Dilabuah
Iyo rancak sabana rancak
Jarangnyo puti ka jodohnyo
Sariklah rajo katandiangnyo.
Badan sadang tinggi samampai
Dek kulik bak kuniang langsek
Abuaknyo ombak baralun
Kaniangnyo kiliran taji
Matonyo sarawuik jatuh
Bulu mato samuik bairiang.
Kok sanyun St. Tumangguang
Indak pueh mato mamandang
Pipinyo balasuang pipik
Gigi tampak dalimo rangkah.
Mande: Manolah Adiak Pandeka Rajo
Kok itu adiak katokan
Urang banyak lah tau juo
Tapi nan sakarang kini nangko
Indak amuah jo itu sajo
Kok rancak iyo lai rancak
Kapandaian sabuah tido
Kini tingga malah adiak
Ambo taruih pai juo
Ka rumah Pandeka Sati.
Alunlai sampai inyo tagak
Datang urang mambawo talam
Barisi nasi lauak pauak
Sambia duduak inyo manyambah.
Istri Pandeka Rajo: Manolah Ande Puti kami
Aluh nah lamo Ande duduak
Haru kini kalua aia
Maklum kami urang kampuang
Indak sigap indak taraja.
Halaman:Sutan Tumangguang Nan Rancak di Labuah.pdf/38
↓Laman ko alah sah
