Sudah pulo minun jo makan
Mamintak diri anyo lai
lyo ande Puti Ameh Urai
Andak taruih inyo garan
Iyo ka rumah Pandeka Sati
Maliek rupo nan bak kian
Bakato Pandeka Rajo.
Pandeka Rajo: Mande kanduang janyo ambo
Usah ande tagak dahulu
Makanlah siriah agak sakapua
Amak ambo batuka baju
Ambo antakan bundo ka sanan
Iyo ka rumah Pandeka Sati
Ari basarang sanjo juo
Indak elok tampak dek urang
Ande tuo bajalan surang.
Mande: Jokok baitu kan baiaknyo
Manuruik pulo denai sanan
Bakato malah pado si Upiak
Mungkin talambek Pandeka pulang
Kito taruih ka ruinah gadang.
Bajalan malah kaduonyo
Bajalan baguluik-guluik
Bak ayam dikaja musang
Tacangang urang maliek
Tapi tak ado nan barani
Untuak batanyo maso itu.
Dek bajalan lari-lari anjiang
Takeh juo inyo tibo
Iyo ka rumah Pandeka Sati
Dek elok langkah dari rumah
Tapek bana palangkahannyo
