Page:Sutan Tumangguang Nan Rancak di Labuah.pdf/41

Pandeka Sati sadang bapakai
Andak bajalan inyo tampaknyo
Baru inyo turun ka halaman
Maliek urang nan datang tu
Takajuik juo inyo saketek
Lalu bakato maso itu.

Pandeka Sati: Salah pandang ambo agaknyo
Atau iyo sabananyo
Pacuak adaik tiang Nagari
Tasasek ka halaman ambo
Mari naiki janjang lapuak
Masuak ka suduang-suduang buruak.

Mande : Mano adiak Pandeka Sati
Indak sasek indak bamimpi
Memang sangajo dari rumah
Datang manjalang rumah adiak
Ado kato kan dikatokan.

Tapi sungguahpun baitu
Batanyo juo denai daulu
Adiak tampaknyo bapakaian
Ka mano tampek nan dituju.

Pandeka Sati : Jangan tahambek Ande garan
Untuak naiak ka rumah ambo
Tantang ambo bapakaian ko
Bukan handak ka mano-mano
Hanyo ka lua makan angin
Sambia pai ka rumah Pandeka Rajo
Untuak bahandai-handai sajo
Ndak ado makasuik jo tujuan.

Mande: Kok baitu bunyi carito
Lah elok banalah itu kini
Denai ko datang kamari
Andak manjapuik Pandeka Sati