Iyo dek Buyuang Sutan Tumangguang
Mainda pulo malah kito
Maninggakan laman sasaran
Amak tanang inyo karajo
Iyo si Buyuang anak denai.
Pado katiko itu juo
Barangkek urang nan banyak
Maninggakan halaman rumah
Tinggalah urang nan batigo
Barampek dangan Buyuang Geleang
Dek diminto Rancak Dilabuagh.
Tantang kapado Rancak Dilabuah
Dek umua lah panjang juo
Lah labiah tujuah baleh tahun
Lah ampia salapan baleh
Iyo lah payah inyo tampaknyo
Iyolah tagang urek-urek
Payah inyo manganjua langkah
Lah barek maayun tangan
Tagalak Pandeka dalam ati
Maliek lenggang lenggoknyo
Jangga tempang lagak langgamnyo
Bak paja baru pandai bajalan
Saroman anak ka marangkak.
Untuang ndak ado paja-paja
Nan mancaliak inyo basilek
Kok ado anak-anak ketek
Umua sapuluah jo sabaleh
Abih bakukuak inyo garan
Maliek si Rancak baraja tu
Kaki tagang tangannyo kaku
Lihianyo indak bagarak
52
