Suruah datang inyo ka mari
Buliah nyo cubo-cubo pulo
Manuruikkan langkah kami
Dek inyo kan sato pulo
Pai masuak ka galanggang
Galanggang Puti Gantosari.
Mande: Mano pandeka nan baduo
Itulah kato sabananyo
Lah lupo sajo denai sanan
Ibu bapaknyo indak manyarahkan
Tangguangan kami itu beko
Inyo nan bukan urang lain
Bau kunyik bau sarai
Jo kami di rumah nangko.
Denai suruah inyo ka mari
Main kalian sabanta lai
Kami manunggu ateh rumah
Jikok baitu nan ka elok.
Lah lamo juo sudah itu
Barulah naiak kaampeknyo
Alah tadanga bunyi angoknyo
Lah bih mandi inyo dek paluah
Tapi galaknyo badarai-darai
Lai mah suko itu garan.
Sabanta malapeh panek
Dibuka malah tuduang saji
Tampak talam barisi nasi kunyik
Basinggang ayam di atehnyo
Tampak pulo sabuah lai
Barisi kalamai paniaram
Dek sabuah lai pulo
