IV. RANCAK DILABUAH MASUAK GALANGGANG
Lah duo ari nyo baraja
Pado pagi-pagi buto
Alunlai tabik matoari
Sadang tabang-tabang lalek
Alun tabuka kandang ayam
Alun jaleh nan ka ditampuah
Alah barangkek Rancak Dilabuah
Di ateh kudo Samburani
Basamo si Buyuang Geleang
Manunggang kudo Balang Candai
Barangkek manuju Pandai Sikek
Manjalang galanggang Gantosari.
Bajalan kaki manuruikkan
Iyo inyo Pandeka Rajo
Sarato inyo Pandeka Sati
Diiringkan Bujang Salamaik
Mangapik ayam si Kinantan
Surang lai Buyuang Simin
Mambao ayam Taduang Jalak.
Dek ande Puti Ameh Urai
Malapeh sampai ujuang jalan
Diliek juo dari jauah
Sampai ilang dari mato
Gagahnyo anak ndak tabado
Tampan anggun dipandang mato.
Aia mato badarai sinan
Jokok mancaliak baa gagahnyo
Mungkin urang tabik salero
Sadang awak nan mandenyo
Taharu juo dibueknyo
Ditambah lai pakaiannyo
Iyo pakaian anak tungga
Dek awak lai kayo pulo
59
