Mandapek galanggang usai
Kami bajalan lah dahulu
Lapeh kami jo doa kakak.
Basalam sajo kasadonyo
Babaliak naiak kateh kudo.
Tantang urang si Buyuang Geleang
Ingin garan mamacu kudo
Dek inyo alah biaso
Biapun hanyo kudo baban
Nan lai pado andenyo
Tapi baakan juo
Manuruik adaik jo limbago
Inyo indak buliah mandahului
Iyolah kudo Samburani.
Tantang rang mudo Sutan Tumangguang
Tinggi satingkek di atehnyo
Bukan tinggi dek arato
Tinggi dalam kadudukan
Tapi duduak ateh kudo
Tampak bak cando
Urang gamang
Dek inyo alun biaso
Baraja baru duo ari.
Dek lamo lambek di jalan
Sampailah inyo kanan langang
Lah tibo di Ikua Lubuak
Turun sabanta makan siriah.
Lah ilang pulo malah panek
Lalu bakato Rancak Dilabuah,
Rancak Dilabuah: Mano Tuan Pandeka Rajo
Nak lakeh kitoko sampai
Naiaklah Tuan ka ateh kudo
Denai duduak di balakang.
61
