Gadang tinggi manariak pandang.
Maliek ayam nan baitu
Agak tarusuah Buyuang Geleang
Kok kalah Taduang baeko
Tantu awak mambaia taruah
Amehnyo urang nan punyo.
Mancaliak puceknyo Buyuang Geleang
Babisiak Sutan Tumangguang.
Rancak Dilabuah : Usah kawan garik sanan
Usah Buyuang takuik-kalah
Kok Kinantan kito nan malawan
Kok kalah inyo baeko
Malu kito kasadonyo
Bialah ameh kito abih
Dari kito mandapek malu.
----------
Mandanga kato nan bak kian
Ka tangah malah Buyuang Geleang
Dibulang si Taduang maso itu
Baru talinyo dilapehkan
inyo balari mangaja lawan.
Ayam dibulang dek nan pandai
Lah lamo pulo ndak balago
Mandapek lawan maso itu
Tinggi gala pua ndak takiro
Ilanglah cameh Buyuang Geleang.
Lamo juo inyo balago
Dek ayam lawan kuek juo
Tapi sudah nyo inyo manang
Mambuek ketek ati lawan
Indak inyo nak basalam
