Taruah dibaia Rajo Janang.
Alah taraso dek si Rancak
Inyo urang di pihak lamah
Mandapek tolong dari Allah
Bakameh inyo nak pulang.
Tapi sabanta itu juo
Turun Datuak dari ustano
Iyo Datuak Rajo Gumanti
Mambawo siriah di carano
Inyo bakato maso itu.
Rajo Gumanti : Mano Tuanku baru datang
Iyolah Sutan urang mudo
Naiaklah tuan ka Ustano
Rajo kami alah mananti
Makan basamo kito kini
Sarato tamu nan banyak ko.
Rancak Dilabuah: Manolah mamak Rajo Gumanti
Kami diundang ka galanggang
Mangapo naiak ka ustano
Nasi tahidang di balairung.
Rajo Gumanti: Kami mangundang Tuan naiak
Karano baru ka galanggang
Rajo jo Sutan nan lain tu
Alah diajak itu garan
Baitu adaik salamonyo
Tidak malabiah mangurangi
Tidak kami mamandang bulu.
Rancak Dilabuah: Tapi ado sabuah lai
Kami banyak sarombongan
Iyo sampai baranam urang
Maaflah ambo pado mamak
Bia kami pulang daulu
Barisuak kami naiak
69
