Kok buliah pintak pado mamak
Kami kan kadok ka galanggang.
Rajo Gumanti: Manolah Sutan nan mudo ko
Usah ditulak undangan ambo
Tidak rajo manulak sambah
Kanai berang ambo baeko
Disangko ambo nan ndak pandai
Iyo mangajak tamu naiak.
Pado maso dewaso itu
Mandakek Pandeka Rajo
Lalu bakato babisiak-bisiak.
Pandeka Rajo: Manolah mamak kato ambo
Usah ditokak undangan tu
Patando baiak itu garan
Dek urang suko pado kito
Tantangan kami nan barampek
Tak patuik pulo kami naiak
Kami kan makan di balairung.
Rancak Dilabuah: Mano tuan Pandeka Rajo
Ambo hanyo babaso sajo
Andak mancaliak gayo urang
Iyo maimbau sabananyo
Atau sakadar baso pulo
Dicubo-cubo ati urang
Indak ambo manulak abih.
Mano kawan Sutan Tangah Ari
Baapo garan pandapek kawan
Lai kok patuik kito naiak
Pado ari nan patamo ko
Kito nan bukan anak rajo
Tidak urang nan bakuaso.
Buyuang Geleang: Pado pikiran ati ambo
Sadang kawan Sutan Tumangguang
70
