Halaman:Sutan Tumangguang Nan Rancak di Labuah.pdf/73

Lah patuik bana tumah naiak
Biapun bukan Rajo Gadang
Anak urang nan sadang bakuaso
Tapi lai balahan Harimau Campo
Tuan gadang dari Batipuah.

Sabagai pulo itu garan
Di rumah Gadang nan baukia
Indaklah ado maso kini
Anak bujang atau rang mudo
Nan patuik masuak ka galanggang

Rancak Dilabuah: Kalau baitu kato kawan
Mari kito naiak ustano
Kito baduo sajo naiak
Nan lain masuak ka balairung.

Buyuang Geleang: Mano kawan Sutan Tumangguang
Dangakan malali kato ambo
Iyo kito bakawan bana
Sampamainan sajak ketek
Ka ilia samo ka ilia
Ka mudiak samo ka mudiak
Tapi ado bateh-batehnyo.

Indaklah patuik itu garan
Ambo naiak basamo kawan
Sado urang kan tahu juo
Ambo mamakai baju basalang.

Bakudo di kudo urang
Mambawo pundi ameh urai
Bukan do dari puro mande
Tidak dari saku bapak
Kasiah tapantiang dek urang lain
Malu ambo naiak ustano.

Rancak Dilabuah : Usah baitu kato kawan
Kito alah samo sapakaik

Templat:Right