Untuak baduo ka galanggang
Sagalo nan tasuo siko
Baduo kito maalami.
Dalam bapikia Buyuang Geleang
Ka tangah Rajo Gumanti
Bakato inyo maso itu.
Rajo Gumanti: Manolah tuan kaduonyo
Urang mudo dalam galanggang
Caliak malah ka ustano
Dek Tuanku Sidi Marajo
Lah tagak garan di jandela
Tuan Puti Ambun Suri
Tagak pulo inyo garan
Inyo tagak di kapalo tanggo
Manunggu kito naiak janjang
Baurak langkah malah tuan
Urang mudo kaduonyo
Ambo manuruik di balakang.
Rancak Dilabuah: Jiko baitu kato mamak
Bajalan mamak daulu
Manjadi patunjuak bakeh kami
Usah sasek kami baeko.
Bajalan malah Rajo Gumanti
Manganjua langkah ciek-ciek
Taguluik tidak lamban tidak
Sadang elok dipandang mato
Dituruikkan rang mudo nan baduo.
Taranti urang nan manyabuang
Sarato urang pancak silek
Dek maliek urang nan baduo
Bak marapulai sadang diarak
Bagai rajo sadang bajalan.
Dari ustano itu garan
Halaman:Sutan Tumangguang Nan Rancak di Labuah.pdf/74
↓Laman ko alah sah
