Tantang buyuang Rancak Dilabuah
Agak tacangang inyo garan
Ado disapo inyo kironyo
Lalu manyambah maso itu.
Rancak Dilabuah: Ampun ambo mande kanduang
Mande ambo bakirim salam
Liau lai manyabuik juo
Undangan untuak basamo.
Rajo Sidi Marajo: Langsunglah anak masuak rumah
Apo kaba tuan denai
lyo baliau Tumangguang Datuak
Sarato Datuak Marajo Lelo
Ayah kanduang dek nak Sutan.
Rancak Dilabuah: Ampun ambo pado Tuanku
Mamak jo ayah bakirim salam
Ado di rumah kaduonyo
Malapeh ambo ka galanggang
Basamo kawan ambo iko
Iyolah Sutan Tangah Hari.
Rajo Sidi Marajo: Anakku Sutan Tangah Hari
Apolah kaba ayah Sutan
Iyo adiak Datuak Sampono
Baliau pun tidak dilupokan.
Buyuang Geleang: Anipun ambo Tuanku Rajo
Ayah jo mande ado manyabuik
Baliau baduo diundang juo
Ado bajanji itu garan
Waktu baralek ingin datang.
Masuaklah bujang kaduonyo
Iyo ka ruang rumah gadang
Rumah gadang sambilan ruang
Salajang kudo balari
Rumah baukia lua dalam
Halaman:Sutan Tumangguang Nan Rancak di Labuah.pdf/76
↓Laman ko alah sah
